Eftir síðustu færslu þá verð ég eiginlega að blogga núna um strákamynd. Ég geri mér fyllilega grein fyrir því að lesendur voru ánægðir með síðustu færslu en nú vil ég höfða til karlkyns lesenda minna. Þeir sem hlýddu á fyrirlestur okkar Villa um Luc Besson átta sig á því að ég hef nú þegar fjallað stuttlega um þessa mynd. Mér finnst hún hins vegar svo góð að ég hreinlega þarf að fjalla ýtarlegar um hana.
Myndin til hliðar sýnir upprunalegt auglýsingaplakat myndarinnar en hún kom út árið 1990 undir titlinum Nikita. Í Bandaríkjunum bar myndin hins vegar titilinn Le Femme Nikita. Myndin fjallar um unga stúlku sem er langt leidd í fíkniefnum og drepur lögregluþjón í einhverju móki, þegar lögreglan böstar hana við innbrot. Í kjölfarið er hún dæmd til dauða en yfirvöld sjá sér leik í hendi og finna not fyrir hana. Nikita er þjálfuð sem leigumorðingi í þágu ríkisisins. Hún var aðeins 17 ára þegar hún braut af sér og þremur árum seinna hafði hún lokið þjálfun sinni. Þá er henni gert að lifa meðal almúgans og bíða fyrirmæla um næsta skotmark.
Hugmyndin að myndinni er virkilega skemmtileg en svolítið brengluð þar sem ríkið slær verndarhjúp yfir afbrotakonu.
Árið 1993 var gerð bandarísk endurgerð af myndinni sem heitir Point of No Return. Eftir að hafa séð trailerinn að henni þá langar mig bara ekkert að sjá hana, ég hafði lesið einhvers staðar að hún væri ekki jafn góð og Nikita þegar ég vann að fyrirlestrinum en þessi trailer sá til þess að mig langar ekkert að sjá þessa mynd. Nikita var einnig innblástur að annari mynd en hún ber heitið Hei mao eða Black Cat og er Hong Kong mynd frá árinu 1991. Á árunum 1997-2001 voru þættir með Petu Wilson sem hétu La Femme Nikita, alls voru gerðar 5 seríur af þeim þáttum eða 96 þættir. Núna nýlegast eru þættir sem hófu göngu sína 9.september 2010 um Nikita í gerð Warner Bros. Mig minnir að ég hafi séð auglýsingu á stöð 2 um að þessir þættir séu væntanlegir en ég gat ekki neitt um það á síðu stöðvar 2. Það er því greinilegt að upprunaleg mynd Luc Besson hafi slegið rækilega í gegn.
Í upprunalegu myndinni frá árinu 1990 leikur Anne Parilaud Nikita. Anne og Luc voru gift þegar myndin var gerð og eiga þau saman barn.
Jean Reno fer einnig með hlutverk í myndinni en það sem einkennir gjarnan myndir Luc Besson er að þær innihalda Jean Reno, tónlist eftir Eric Serra og intro-in í myndum hans eru eins. Öll einkenni Bessons koma fyrir í Nikita og persónulega finnst mér tónlistin í myndinni frábær, hún hentar virkilega vel við. Ég fann ekkert video af introinu í Nikita þannig ég horfði bara á introið í The Big Blue eftir Besson. Það er alveg eins og byrjunin í Nikita. Nikita telst til Cinema du look stefnunnar. Það er að mikið er spilað út á lookið en minna kannski um söguþráð og frásögn.
Ég ætla að láta nokkur athyglisverð video fylgja með að neðan.
Þessi trailer fékk mig til að hlæja
Mér fannst nokkuð gaman að sjá hversu mismunandi trailerarnir eru sérstaklega hversu mikill munur er þáttunum. Það eru sirka 10 ár á milli þáttanna og það er vel greinilegur munur á áherslum í auglýsingum. Nýjasti trailerinn er voða flottur og mikið af hasar á meðan gömlu trailerarnir eru voða rólegir og segja meira um söguþráð myndanna/þáttanna.
Jájá ég veit ég er að blogga um chick flick mynd en ég áttaði mig á því áðan að ég hef ekkert reynt að höfða til kvenaðdáenda minna. Því finnst mér aðeins sanngjarnt að stelpurnar fái eitt blogg um það hvernig skal losa sig við gaur á 10 dögum. Í raun geta stelpur lært heilmargt af þessari mynd, þ.e hvernig þær eiga ekki að haga sér. Hún er einungis með 6.1 í einkunn á imdb en samt hlaut hún þónokkurra vinsælla víðs vegar um heim.
Myndin fjallar um Benjamin Barry og Andie. Andie vinnur hjá Composure og er how to stelpan hjá blaðinu. Hún skrifar greinar um það hvernig skal tala sig út úr hraðasekt, hvernig skal feng sui-a íbúðina þína og margt fleira. Hún er hámenntuð í fjölmiðlafræðum og dreymir um að skrifa um eitthvað sem skiptir máli eins og stjórnmál, heimsfrið og eitthvað því um líkt. Yfirmaður hennar hjá Composure er hins vegar á öðru máli og lofar henni að hún megi skrifa hvað sem er bara ef hún hlýðir sér og skrifi grein um hvernig á að losa sig við gaur á 10 dögum. Hún fer því út á lífið með vinkonum sínum í leit að gaur til að dömpa eftir 10 daga. Þá hittir hún Benjamin Barry.
Benjamin Barry vinnur sem auglýsingafulltrúi og hyggst skipuleggja risa auglýsingaherferð fyrir demantasalann DeLauer. Í fyrirtæki Benjamins vinna Judy Spears og Judy Green en þær vita af verkefni Andie gera veðmál við Benjamin um það hver fær herferð DeLauers. Veðmálið snýst um að Benjamin fái hvaða konu sem er til að verða ástfangna af sér á 10 dögum og mæta með hana á samkomu sem DeLauer heldur. Judy S og Judy G velja Andie sem fórnarlamb Benjamins og telja sig hafa peningana í bankanum.("Money in the Bank").
Myndin fjallar svo á stórskemmtilegan hátt um samband Andie og Benjamin og má með sönnu segja að hvert stúlkubarn verður að sjá þessa stórmynd. Ég hvet allavega þær stúlkur sem lesa bloggið mitt og hafa ekki séð myndina að fara inn á www.smartdvd.is og leigja hana hið snarasta.
Nú eins og sést á fyrstu myndinni fer Kate Hudson með hlutverk Andie og Matthew McConaughey leikur Benjamin Barry. Kate hefur verið tilnefnd til óskarsverðlauna en hún er einna þekktust fyrir leik sinn í þessari mynd og myndunum Bride Wars(2009) og Almost Famous(2000). McConaughey er algjör hjartaknúsari, eins og lesendur mínir eru fullmeðvitaðir um, og er hann þekktastur fyrir leik sinn í Sahara, Failure to lunch og fleiri góðum.
Þau léku svo aftur saman í myndinni Fool's Gold(2008) þar sem hann er ber að ofan og hún á bikiníi alla myndina. Fool's Gold er hálfgerð stæling á Into the Blue með Jessicu Alba og Paul Walker, hún er bara ekkert jafn góð.
How to lose a guy in 10 days er í leikstjórn Donald Petrie en hann gerði Ri$hie Ri$h og Grumpy Old Men. Hann hafði 50 Milljón dollara budget og myndin hefur þénað 177 milljónir. Það er greinilegt að einkunnin á imdb segir ekki alla söguna. Þetta er bara spurning um að höfða til rétta markhópsins. Þeir lesendur sem vilja fræðast meira um þessa mynd geta kynnt sér ýmsan fróðleik á síðunni www.fróðleikurumHTLAGI10D.com þar stendur meðal annars að Gwyneth Palthrow hafi upphaflega átt að leika á móti McConaghey og fleira.
Frábær mynd í alla staði fyrir bæði konur og karla. Þetta er dæmigerð Hollywood mynd og ég vona innilega að allir þeir sem horfa á myndina njóti hennar jafn mikið og ég gerði.
Ég var heima hjá kærustunni minni að líta í gegnum dvd safnið heima hjá henni og allt í einu held ég á Life. Life er frá árinu 1999 og er stjörnumprýdd mynd. Með aðalhlutverkin í myndinni fara Eddie Murphy og Martin Lawrence, auk þess eru Bernie Mac, Anthony Anderson og fleiri þekkt andlit í henni. Ég persónulega þoli ekki Eddie Murphy en þar sem myndin var frekar gömul og hann var betri þegar hann var yngri þá ákvað ég að gefa myndinni séns og lesa aftaná hulstrið. Eftir lesturinn lét ég blekkjast og horfði á myndina.
Það var versta ákvörðun gærdagsins, því myndin var ekkert sérstök og mér fannst þessar 108 mínútur líða eins og heill dagur í skólanum.
Willie Long hefur verið í fangelsi frá því að hann var 13 ára. Willie er sögumaður og er hann að segja tveimur föngum frá ævintýrum Ray Gibsons og Claude Banks. Hann byrjar að segja frá árinu 1932 þegar þeir félagar kynntust fysrt, síðan fylgist áhorfandinn með ýmsum strokutilraunum þeirra í gegnum árin. Ray og Claude eru í camp 8 í einhverju fangelsi í Missisippi. Það sem einkennir camp 8 er að engar girðingar hindra fanga í að strjúka, í stað þess eru verðir með byssur sem skjóta hvern þann sem stígur út fyrir lóðarmörk fangelsins án leyfis.
Ted Demme er leikstjóri myndarinnar, hann hefur meðal annars gert Beuatiful Girls(1996), Blow(2001) og fleiri myndir sem ég kannast bara ekkert við. Eddie leikur Ray Gibson vasaþjóf í New York og Martin er Claude Banks sem vinnur hjá banka í New York. Samband þeirra er ansi skemmtilegt í myndinni en við fáum að fylgjast með tveimur ókunnugum mönnum sem verða bestu vinir einfaldlega því þeir sitja uppi með hvorn annan. Töluvert er um rasisma í myndinni en það er líka samkvæmt sögulegum atburðum.
Á heildina litið er myndin alls ekkert svo slæm málið er bara að ég bjóst við frábærri grínmynd en ég hló voða lítið yfir henni. Two hours of laughter eins og stendur á hulstirnu minn rass, ég lét hulstrið svo sannarlega blekkja mig í þetta skiptið. Anyways hér er trailerinn fyrir áhugasama.
How to train your dragon er teiknimynd sem kom út á árinu 2010. Í helstu bíóhúsum landsins var hún sýnd í 3D. Því miður fór ég ekki á hana í bíó heldur leigði ég hana nýverið með litla bróður mínum. Þið hugsið eflaust: Vá hvað hann er góður bróðir að horfa á teiknimynd með litla bróður sínum! en raunin er önnur, það var ég sem valdi myndina því ég vildi sjá hana! Ég hafði heyrt frá ýmsum aðilum að hún væri glettilega góð og það verður að segjast að hún stóðst mínar væntingar. Myndin er úr smiðju Dreamworks sem hafa undanfarin ár verið með allra bestu teiknimyndirnar
Myndin gerist í litlu þorpi lengst norður í rassgati. Þorpið heitir Berk og er sérstætt að því leytinu til að plágan sem herjar þorpið eru drekar. Flestir íbúar í venjulegum bæ myndu flýja svona aðstæður en íbúar Berk eru blóðþyrstir víkingar og lúta ekki fyrir einhverjum skriðdýrum. Víkingarnir tileinka líf sitt drekaveiðum og allt snýst um að vera sem best hæfur fyrir drekaveiðar. Leiðtogi þorpsins er Stoick the vast og er hann sífellt í leit að heimkynnum drekanna til að losna við þá fyrir fullt og allt. Honum til mikilla ama er sonur hans Hiccup lítill ræfill sem er klunnalegur og engan veginn efni í góðan drekaveiðara. Hiccup þráir ekkert heitar en að fá að vera með í drekaveiðum og fella dreka.
Á einu örlagaríku kvöldi tekst Hiccup að skjóta niður Night Fury með uppfinningu sinni. Drekategundin Night Fury er velkunn þorpsbúum, þeir eru hættulegastir allra drekategunda. Enginn maður hefur drepið Night Fury dreka og væri Hiccup því fyrstur til. En hann getur ómögulega drepið drekann og tekst með þeim vinátta í staðinn. Hiccup nefnir drekann Toothless og saman lenda þeir í ýmsum ævintýrum. Ég vil ekkert spoila þessari frábæru mynd svo þið verðið eiginlega að sjá hana til að vita meira.
Leikarar myndarinnar eru Gerard Butler en hann fer með rödd Stoick the vast. Með hlutverk Hiccups fer Jay Baruchel sem er gæjinn í She's out of my league, Christopher Mintz-Plasse( Red Mist í Kick Ass) leikur Fishlegs og Jonah Hill(Superbad) fer með hlutverk Snotlaut. Eins og nöfnin að ofan gefa til kynna þá er þetta stjörnumprýdd mynd og hafa allir leikarar myndarinnar samþykkt að koma fram í framhaldi myndarinnar. How to Train Your Dragon 2 á að koma í bíó 20. júní 2014.
Ýmiss varningur er seldur í tengslum við myndina en bara við það að skrifa þetta blogg hef ég fundið fullt af einhverjum leikföngum sem eru tengd myndinni. Áhugasamir geta farið á síðuna Vefverslun Bing.com.
Soundtrack myndarinnar er ekki af verri endanum en Jón Þór Birgisson betur þekktur sem Jónsi í Sigurrós samdi lagið Sticks and Stones fyrir myndina. Endilega horfið á myndina ef þið hafið gaman af teiknimyndum á borð við Shrek,Toy Story o.fl. þið verðið ekki fyrir vonbrigðum.
Sherlock Holmes ætti að vera öllum kunnugur, en hann er aðalpersóna bóka Sir Arthur Conan Doyle. Sherlock er einkaspæjari sem notast við rökrétta hugsun og nýjustu tækni til að leysa erfið mál en einnig notast hann við ýmis dulargervi. Honum til hjálpar er góðvinur hans Dr. Wattson en í nær öllum bókum Doyles er Wattson sögumaðurinn. Saman takast þeir á við ýmis erfið mál.
En árið 2009 kom út myndin Sherlock Holmes og naut hún gríðarlegra vinsælda. Ég fór á hana í bíó back in the day en sá hana aftur þegar ég var að fletta á milli stöðva á Sky Dreamboxinu. Það var líkt og ég hefði ekki séð hana áður. Ég datt gjörsamlega í hana(það var ekki hægt að ná sambandi við mig) og skemmti mér alveg jafn vel og ég gerði í bíó salnum. En leikstjóri myndarinnar er Guy Ritchie, sumir þekkja hann kannski sem fyrrverandi eiginmann Madonnu. Hann hefur leikstýrt mörgum góðum myndum og má þar helst nefna Snatch og RocknRolla sem eru báðar tvær alveg frábærar. Einnig gerði hann Lock, Stock and Two Smoking Barrels sem mig dauðlangar að sjá. Það sem myndir Guy Ritchie hafa sameiginlegt er góður húmor. Þær eru bara almennt mjög svalar.
Sherlock Holmes fjallar um hina margrómuðu vini Holmes og Wattson en saman leysa þeir ráðgátur um hinn dularfulla Lord Blackwood. Blackwood hefur framið morð á 3 stúlkum þar sem þeim er fórnað í einhverri myrkri athöfn. Blackwood er fangelsaður af Holmes, hengdur og tilkynntur dauður af Wattson. London borg er því dauðskelkuð þegar Lord Blackwood snýr aftur upp frá dauðum með sín illu ráðabrugg. Með aðalhlutverkin fara Robert Downey Jr. og Jude Law. Eru þeir ansi góðir í myndinni og sýna þeir vel skemmtilegt samband milli Holmes og Wattson. Í myndinni hyggst Wattson giftast unnustu sinni Mary en Sherlock á erfitt með að sætta sig við það. Sömuleiðis á Wattson erfitt með að halda sig frá Sherlock og ævintýrum hans.
Downey Jr. fer á kostum sem Sherlock Holmes og nær karakter hans lystilega vel. Hann er vægast sagt stórfurðulegur en um leið bráðgáfaður. Bardagaatriðin í myndinni eru einstaklega töff að mínu leyti og einkennandi fyrir karakter Sherlocks. Wattson er líka vel að sér í bardagalistum en hann er fyrrum hermaður. Guy Ritchie hefur gríðarlegan á huga á Brazilian Jiu Jitsu og MMA en í einu bardagaatriðinu er Dredger yfirbugaður með choke-i. Það sem heillar mig við myndina er hvernig áhorfandinn fylgist með morðrannsókninni en er samt alltaf einu skrefi á eftir Sherlock. Ritchie undirstrikar það svo með skotum þar sem sama atburðarrásin er sýnd frá tveimur mismunandi sjónarhornum. Annars vegar það sem áhorfandinn sér og tekur eftir og svo hins vegar það sem Sherlock aðhæfist við. Annað sem ber að nefna er að Sherlock er einkaspæjari svo hann vinnur ekki beint hjá Scotland Yard. Yfirmenn lögreglunnar eru hreinlega einhverjir asnar sem þola ekki Sherlock en þarfnast hans nauðsynlega.
Virkilega vel skrifað handrit en myndin er ekki byggð á neinni sérstakri bók eftir Doyle. Til að mynda segir Wattson í myndinni að Sherlock sé að drekka augnmeðal en á þeim tíma var kókaín notað sem deyfilyf fyrir augnaðgerðir. Er þetta vísun í kókaín neyslu Sherlocks í bókunum. Myndbandið að neðan sýnir að bardaginn er auljóslega fenginn að láni en það breytir ekki skemmtanagildi hans :)
Einnig voru gerðir þættir um Sherlock Holmes af BBC sem heita Sherlock en þá eru Sherlock Holmes og Wattson í nýlegu umhverfi. Ég hef séð einn þeirra og fannst hann nokkuð góður en Robert Downey Jr er klárlega betri Sherlock en dúddin frá BBC.
Á þessu ári er væntanlegt framhald af Sherlock Holmes mér til mikillar ánægju. Myndin heitir Sherlock Holmes: A Game of Shadows en hún er einnig undir leikstjórn Guy Ritchie. Í henni tekst Sherlock á við erkifjanda sinn Professor Moriarty.
Það var bara venjulegur skóladagur og við Villi vorum að læra á Íþöku. (veit rosalega duglegir :D) Svo fór ég út í símann og upp úr þurru komu tvær konur að mér og réttu mér 2 frímiða fyrir 2 á forsýningu stórmyndarinnar Buried. Við fellarnir skelltum okkur því á double-date sem reyndist svo vera triple-date því Jón kom með okkur. Þegar við mættum voru nær eingöngu MR-ingar í salnum, nokkrir MH-ingar og svo einhverjar hræður úr Versló. Það er því nokkuð ljóst að Bíó Paradís er að vekja áhuga ungs fólks á því starfi sem þau eru að gera en Bíó Paradís sýnir til að mynda mun fleiri myndir á ári en nokkurt annað bíó á Íslandi. Mér finnst þetta sniðugt verkefni hjá þeim því hin bíóin sýna nær eingöngu týpískar Hollywood myndir. Ja nema Háskólabíó þeir eru með einhverjar gamlar myndir líka. Já og annað sem var mjög fínt við sýninguna var það að það var ekkert hlé á myndinni.
Já eins og myndin til hliðar gefur til kynna þá er aðalleikari myndarinnar Ryan Reynolds(kærustu minnar til mikillar hamingju) og í raun á skjánum allar 95 mínúturnar. Paul Conroy er Bandaríkjamaður sem keyrir vörubíl í Írak. Ráðist er á bílalest þeirra og allir drepnir nema Paul. Hann vaknar 6 fet undir jörðinni einhversstaðar í Írak í líkkistu með kveikjara og síma. Það vill svo til að síminn er stilltur á írösnku en hann gerir auðvitað það sem allir myndu gera og reynir að ná sambandi við sína nánustu. Að svo búnu hringir hann til Bandaríkjanna í hinar ýmsu stofnanir. Einhverja gísladeild, FBI, fyrirtækið sitt og fleira. Mér fannst þetta í raun bráð fyndin mynd því hún er svo sterk ádeila á kerfið í Bandaríkjunum. Það er sama hvert hann hringir þá fær hann alltaf sömu asnalegu spurningarnar, settur á bið og talar svo við næsta yfirmann.
Leikstjóri myndarinnar er Rodrigo Cortés, og finnst mér hún vel leikstýrð.Þetta er ekki dæmigerð Hollywood mynd með sprengingum, ástarsenum og allt það, Nei! þetta er maður fastur í líkkistu. Samt er hún mjög góð.
Það er ekki hægt skrifa mikið meira um mynd sem gerist í kassa án þess að spoila einhverju. Kostirnir við myndina eru að hún er nokkuð frumleg, hefur kostað lítið í framleiðslu, flottur leikur hjá Reynolds(hefði ekki getað verið fastur í svona kassa tímunum saman) og vel gert handrit. Spennan er lengi að byggjast upp en verður hreint út sagt mögnuð í lokin.
Annað video sem ég rakst á við leitina að trailernum :)
